ANWAR ENDA MUJUR BEJALAIKA PENGAWA IYA

Bakani deka ngemansangka Batang Ai enti Permatang Pauh agi meruan enda mansang

Apin lama ke udah, kira 10 iku kaban Parti Rakyat Sarawak (PRS) ari sitak (DUN) Batang Ai bisi udah nemuai ke sitak Parlimen Permatang Pauh deka meda kediri empu gaya pemansang enggau pendiau pengidup orang ba sitak menua nya.

Raban sida nya diuluka Jackson Melintang, iya nya siku orang ti dikarapka Presiden PRS Dato Sri Dr James Masing.

Kelimpah ari aku empu, sida bukai ti sama enggau nemuai nya iya nya Penghulu Jaul Lutau, Kaunselor Gerang Jubing, Kaunselor Jugat, Kaunselor Temeling Jua, Kaunselor Nyelang Jimbau, Naka Indap, Jyanita Melai, Roselind Lanyau enggau Jimbun Tawai.

Lebuh ti datai di Permatang Pauh, menua ti dipegai Ketua Umum Parti Keadilan Rakyat, Datuk Seri Anwar Ibrahim enggau bini iya Datuk Seri Wan Azizah Ismail , bala kami tekenyit lebuh meda gaya pemerinsa pendiau orang menua nya ti agi apin tentu mansang.

Kami asai ti enda arap meda penyai gamal rumah ti endur orang menua nya diau lebih agi enggi bansa Bunmiputera.

Nya alai ku ati aku, nama utai ti ulih dikereja Anwar Ibrahim dikena ngemansangka Batang Ai munyi ti dalam jaku kimpin iya, enti sitak menua ti sigi patut dikemansangka seduai melaki bini dalam kandang 27 taun tu ke udah, agi mengkang tinggal enda maju lalu pendiau pengidup rayat iya mega agi jauh tinggal laban nadai pemansang.

Kandang menua ti disebut nya tadi iya nya Kampung Bagan Serai di Seberang Prai, Pulau Pinang.

Lebuh kami baru datai ba kampung nya dia bala kami meda indu tiga iku benung muai pala ikan pusu dikena ngaga sambal ‘nasi lemak’ ke dijual.

Lebuh ti ditanya bakani gaya pendiau sida dia udah bekau parti penyakal berengkah megai perintah menua Pulau Pinang dia siku ari sida indu nya madahka diatu pendiau sida nyau merinsa agi ari suba.

“Peda pendiau kami tu ti enda dikibuhka perintah ti megai menua kami diatu.
“Dikena ngidupka diri, kami sebilik enggai nyadi enda bedagang menggal mit.
“Enti ngarapka wakil rayat kami Anwar nya ngubah pengidup sereta ngangkatka penatai pemisi kami ditu, sigi nadai utai dikarapka,” ku iya.

Indu nya mega madahka sekumbang seduai melaki bini (Anwar Ibrahim enggau Wan Azizah) udah nyadi wakil rayat sida, sida nadai kala udah ngasaika pengelantang nambahka nya utai ti disemaya ke seduai iya ngelamatu nadai kala dititihka.

Ngambika nemu silik agi pasal penusah rayat dia, aku bisi betemu lalu berandau enggau Mustaffa Ismail ti nyadi Pengerusi Jawatankuasa Kemajuan dan Keselamatan Kampung Persekutuan (JKKKP), Jalan Hussein Onn.

Nyadi ku Mustaffa, Anwar suah bejaku peneka ati lalu mayuh bendar utai ti disemayaka iya ngagai rayat ba kandang menua nya ti semina tinggal jaku semaya aja.

“Orang ti baka Anwar tu endang sigi rindu besemaya tang enda kala nundaka semaya iya, nya alai kita di Sarawak anang mudah arapka jaku iya (Anwar),” pia ku iya.

Iya madahka Anwar mega semina bisi berundingka pengelantang diri empu aja laban udah iya ti menang bediri ba sitak Permatang Pauh, iya pulai baru ke Kuala Lumpur lalu jarang bendar ngabas sitak menua nya lebih agi di Bagan Serai.

“Bini iya Wan Azizah semina tiga kali udah nemuai ngabas kampung kami tu sekumbang empat taun ti udah nyadi wakil rayat kami ditu,” ku iya.

Mustaffa madahka diri suah udah ngenataika ripot ngagai perintah pasal sistem parit ba kampung nya ti enda tentu manah tang lalu nadai kala dikibuhka perintah.

Ketegal nya, berapa belas kali rumah di tisi jalai nyin udah ampuh ai, ku iya.
“Ripot ti dikenataika kami ngagai Anwar endang nadai kala dikibuhka iya, nya alai bakani iya ngumbai diri tau ulih mutarka penusah orang di Batang Ai”.

Mustaffa madahka ripot sida bekaul enggau penusah pasal parit ba kampung nya mega kala dipansutka dalam suratkabar tang nya pen nadai kala dikibuhka.

Udah lepas nya, raban kami lalu dibai orang ti nguluka kami nya ngagai pasar Permatang Pauh. Ari gamal utai ti dipeda kami, pasar Permatang Pauh tau dikumbai ‘lembau idup’ laban tebal agi kedai ba pasar nya ditutup.

Nyadi ku orang ti nguluka kami nya, kedai ba pasar nya mayuh ditutup laban nadai mayuh orang datai napatka pasar nya endur bebeli ke utai.

“Kedai ba pasar tu mayuh di tutup taja pen bisi dilekatka ‘iklan’ diserata endur dikena ngelakuka kedai ngagai orang ke deka nyuwa tang nadai ga orang deka nyuwa kedai nya,” ku iya.

Bakanya mega gaya pendiau pasar ngelingi menua Permatang Pauh ti agi mengkang pasar tukuh lama magang.