Bisi kira 4,000 iku penyukung pengari ti bediri minta pilih begelumu ba Kompleks Sukan Lubok Antu ti nyadi palan alai nganjung nama pengari ke pengawa bepilih mit DUN Batang Ai. Penyampau penyukung pengari BN, Malcolm Mussen Lamoh nyauka bela enggau pemayuh penyukung pengari PKR, Jawah Gerang.
Kira 40 peratus ari 22,270 rayat Batang Ai ti datai ari 238 buah rumah panjai agi ngarapka sungai ditengah mindah kin kitu. Kenu ku berita nyauka semua perau udah dulu disuwa PKR. Raban ti kimpin ke BN nyau bebendar begigaka perau bukai dikena nengah sungai lalu pia mega kerita darat lebuh maya kimpin tu. Nya meh pengelandik PKR ngatur pengawa sida.
Nitihka rijista nama pengundi ba sitak menua ke bulih 1,341 kilometer besegi nya, penyampau pengundi bisi 8,006 iku, ti alai 95 peratus ari sida nya Iban lalu bisi 24 iti palan alai ngundi bisi dibuka maya hari ngundi.
Lebuh pengawa bepilih mit di Batang Ai diatur nyeretai pengawa bepilih mit DUN Bukit Selambau di Kedah enggau sitak Parlimen Bukit Gantang di Perak, orang di Semenanjung tentu balat agi beratika sitak ‘dua iti bukit’ nya ti alai BN bisi besatup enggau Pas enggau PKR.
Tang taja pia, pengawa bepilih di Batang Ai mega besai bendar reti laban tu endur PKR ti dipegai Datuk Seri Anwar Ibrahim nyukat ni pemalat sukung orang menua tu ngagai iya, menua ti dipegai Kepala Menteri, Tan Sri Abdul Taib Mahmud, ti semampai nyadi kubu BN ngelamatu.
Tuju Anwar nyengala bendar, iya nya mai bala pengundi di Sarawak lalu nangkanka nya ila di Sabah ngambika nyukung raban parti penyakal ari Semenanjung (PKR, DAP & Pas) numbangka BN ba Parlimen dikena ngulihka juluk iya ti enda badu-badu deka nyadi Perdana Menteri.
Pemutus pengawa bepilih besai 2008 udah ngayanka bakani raban parti penyakal ti betuaika Anwar puntan numbangka BN laban enda disukung rayat di Sabah enggau Sarawak. Udah lepas nya, Anwar nguji mai bala kaban Parlimen BN ari Sabah enggau Sarawak merejuk ngagai raban penyakal lalu netapka 16 September 2008 nya hari endur numbangka perintah besai BN lalu numbuhka perintah baru.
Anwar suah bendar begendangka penyampau tubuh kaban Parlimen BN ti deka merejuk ke sepiak endang udah chukup dikena iya numbangka perintah BN lalu nyentukka 15 September 2008 nya iya agi madah ngagai pengarang berita utai ti diperambu iya nya meruan deka nyadi nyata. Tang udah nya, 16 September 2008 nya nyengala ‘bula besai Anwar’.
Anwar ti sigi tebilang kering ati sereta enggai ngaku diri alah sigi enda jera seagi-agi juluk ati iya ti deka nyadi Perdana Menteri nya apin ulih dikemujurka iya. Iya ti udah nyadi Timbalan Perdana Menteri sereta udah diukum jil ketegal penyalah makai suap nya lalu ngubah chara iya lalu balat agi kimpin dikena mai rayat Sabah enggau Sarawak nyukung iya enggau raban parti penyakal ari Semenanjuung.
Lebuh pengawa bepilih mit di Batang Ai tu diatur ketegal pemarai niang Unting Ingkot, Anwar nemu tu sebengkah awak dikena iya mai rayat Sarawak nyukung iya enggau raban penyakal ari Semenanjung.
Enti nyema menang, nya dikira bonus lalu enti alah pen enda ngawa laban pengawa bepilih mit tu semina endur iya berindik ngachau BN Sarawak ari ti belabuh ngapi rayat begedi ke perintah BN ari diatu, ti dikarapka iya nyau mansang nyadi senyadi lebuh datai maya pengawa bepilih besai ke dudi ila.
Chara ti dikena Anwar nya sebaka enggau chara ti majak dikena iya di Semenanjung nyentuk ke diatu.
Keterubah iya, sabung orang belaya entara raban bansa lalu kedua, naka ulih bejai bala tuai perintah BN Sarawak iya nya Taib Mahmud nengah ‘media baru’ baka blog enggau laman web.
Di Semenanjung, Anwar nengah Hindraf enggau slogan Makkal Sakhti udah mujur ngapi ati rayat bansa India lalu ngutuk Dasar Ekonomi Baru (DEB) dikena iya ngulihka sukung ari raban bansa China. Ni bagi repik-repik utai ti tau ngasuh rayat enda tembu ati endang dipuput iya magang, dikena iya berindik awakka ngapi pemedis ati rayat ngagai perintah BN.
Bala hakim, polis, badan pecegah rasuh enggau Pejabat Peguam Negara enda badu-badu diselinting sereta dikutuk raban penyakal ti betuaika Anwar. Diatu bala Raja mega dikutuk bala penyakal ti betuaika Anwar ti ngumbai bala Raja nyukung BN. Semua utai tu dikereja ketegal siti tuju aja iya nya numbangka BN lalu nirika Anwar nyadi Perdana Menteri.
Anwar endang udah ngena chara iya ti bejai tuai ti pengabis atas sekumbang iya ti udah dibuai Tun Dr. Mahathir Mohamad ari ti nyadi Timbalan Perdana Menteri suba. Bala penyukung Anwar ti chukup pandai ngerembaika propaganda bekenaka teknologi enggau media baru udah naka ulih ngutuk sereta bejai Dr. Mahathir. Anwar nadai ngenang budi Dr. Mahathir ti mai iya masuk UMNO sereta ngemuntang jalai ke Anwar ngambika tau nganti penuduk iya nyadi Perdana Menteri.
Tun Dr Mahathir tentu bisi kebuah ti berat alai iya muai Anwar. Mahathir sigi sayau ke Anwar lalu iya sanggup nejuka iya nyeliahka Tun Ghafar Baba ke tisi.
Udah Mahathir nyurut ke diri bala penyukung Anwar ti bekenaka media baru berengkah nyelinting sereta bejai Datuk Seri Abdullah Ahmad Badawi. Mayuh macham utai ditulis, kartun enggau gambar ti bejai Pak Lah bisi diayanka ba blog enggau laman web ngambika rayat enda bebasa sereta begedi meda iya, perintah iya enggau parti ti dipegai iya.
Lebuh Pak Lah udah enda dibasa rayat enggau bala kaban parti iya empu (UMNO) agi penyukung media baru Anwar bekuing lalu bejai Datuk Seri Mohd Najib Tun Razak. Sida enda badu-badu begendangkan berita ti ngumbai Najib bisi kaul enggau kes bunuh Altantuya. Sida agi majak nuduh iya taja pen Najib udah bisi besumpah dalam nama Allah iya sigi nadai kaul enggau penyalah nya.
DAP enggau Pas sigi nemu tuju pengawa Anwar tu tang sida sengaja nyukung Anwar semina ketegal ti balat begedi ati ke BN ti endang munsuh politik sida lalu nya meh ti nyerakupka Anwar enggau DAP enggau Pas ti selubang runding deka numbangka BN.
Enti nyema sida mujur numbangka perintah BN pen kaul sida enggau pangan diri enda ulih tan lama laban penemu enggau tuju politik sida bela enda sebaka. Enti BN udah labuh dia idar sida agi ngetanka sereta ngerembaika kuasa sida. Lama laun sida deka belaya enggau pangan diri ti ngujungka perintah menua tu enda tegap sereta bisi penyarut.
Diatu menua Sarawak nyadi kelang endur Anwar ngasurka juluk ati iya empu. Blog penyukung Anwar udah berengkah bejai Taib Mahmud ti udah merintah menua Sarawak enggau tegap ba pengelama 28 taun. Kelimpah ari pekara bukai sida bebantaika pekara pasal tuai menua tu ti kelalu lama nyadi tuai.
Tang enti nyema Taib Mahmud nyurutka diri ari nyadi Kepala Menteri seharitu pen, barang bagi orang bukai ti nganti iya lepas nya pen sama bela deka dikutuk sereta dipejai raban penyukung Anwar. Sebaka enggau ti nyadi ba Tun Mahathir, Pak Lah tauka Najib.
Kati ku Anwar tu, nadai penyalah mimit iya tu kini? Enti meda utai ti bisi ditulis dikena sida penyukung Anwar tu bejai orang, bakanya meh gaya utai ti deka disadung sida ngagai rayat di Semenanjung lalu diatu ngagai rayat Sarawak. Pilih meh Anwar ti enda makai suap, pemadu pandai megai menua sereta pemadu manah ulah, kenu ku sida.
Tang sayau seribu kali sayau sida semina ngelala Anwar sekejap aja, ari jauh lalu nyangka semina bechuanka jaku puji bala penyukung Anwar empu ti betati deka niki nyeretai iya ketegal bisi juluk deka nguntungka diri empu.
Kelimpah ari ti bejai Taib Mahmud bala Anwar mega nyabung raban bansa di Sarawak. Ti diselinting sida bansa Dayak ti mayuh agi tubuh di Sarawak ngambika begedi ke bansa bukai ba menua nya baka bansa Melanau, iya nya raban bansa Taib Mahmud.
Laban Taib Mahmud enggau sebedau nya Tun Abdul Rahman sama bansa Melanau dia chara mudah dikena Anwar nyabung raban bansa tu belaya, iya besemaya meri penuduk Kepala Menteri Sarawak ngagai bansa Dayak enti raban penyakal ari Semenanjung ulih megai menua Sarawak ila.
Tu janji manis iya ngagai bala pengundi di Batang Ai ti tebal agi bansa Iban, iya nya raban bansa Dayak ti mayuh agi tubuh. Anwar enda malu besemaya bakanya indah enda baka iya ti besemaya ke 16 September 2008 ngagai rayat di Semenanjung lebuh pengawa bepilih mit di Permatang Pauh suba.
Iya ti bendar pekara pemansang, makai suap, enggau sebarang pekara bukai nya pekara dudi ba Anwar ti semina endur iya berindik dikena ngulihka juluk ti deka nyadi Perdana Menteri Malaysia. Ba Anwar Ibrahim siku, rayat Malaysia baik di Semenanjung, Sarawak tauka di Sabah semina dikena iya berindik aja.
Nama kebuah iya deka nyadi Perdana Menteri? Iya semina deka ka Anwar nyadi Perdana Menteri, nya aja. Laban ba runding iya, semina iya siku aja mensia ti pemadu patut nyadi Perdana Menteri Malaysia. Sebaka enggau Amerika Syarikat (pangan Anwar) ti numbangka Saddam Hussein, nama kebuah? Semina ketegal deka numbangka Saddam Hussein sereta ngayan ka penguat Amerika enggau Presiden Bush aja. Udah Saddam tumbang, menua Iraq balat agi charut sereta merinsa agi ari sekumbang ti dipegai Saddam.
Nya alai, enggai enda madah ngagai bala kita pengundi mayuh di Batang Ai, Jawah Gerang tentu udah buya taju Anwar. Tentu bisi utai dipelalai ti disemaya ke Anwar ngagai Jawah. Nya alai, enti kita nyukung Jawah, reti nya kita nyukung Anwar, ke alai pemula besai ‘16 Septembar 2008’ iya udah di[pansutka ngagai rayat di Semenanjung.
Subscribe to:
Post Comments (Atom)
No comments:
Post a Comment